अर्घाखाँची । अर्घाखाँचीको धार्मिक तथा पर्यटकीय स्थल अर्घा दरवारको पुनर्निमाण कार्य शुरु भएको छ ।
बाइसे चौविसे राज्य अन्तर्गत पर्ने यस राज्यको दरवार पहिलेकै अबस्थामा रहने गरि पुरानो शैलीमा पुरातत्व विभागले निर्माण शुरु गरेको हो ।
पुरातत्व विभागको अन्वेषण र खोजीका आधारमा बाइसे चौविसे राज्य अन्तर्गत पर्ने राज्य कालको अवधिमा भएको डिजाइन र शैलीमानै निर्माण कार्य शुरु भएको दरवार संरक्षण समितिका अध्यक्ष सरोज भुसालले बताएका छन् । यो दरवार तीनतले रहेको अनुसन्धानबाट पत्ता लागेको छ ।
दरवार निर्माण शुरु भएपछि अर्घा भगवती मन्दिरमा पर्यटकहरु पनि बढी आउने अपेक्षा रहेको मन्दिरका पुजारीको भनाइ छ ।
हाल यस मन्दिरमा एसियाकै सबैभन्दा ठूलो भगवती मन्दिरको मूर्ति प्रतिस्थापन गरिएको छ। सन्धिखर्क नगरपालिकाले अर्घा दरबार अर्थात् अर्घा भगवती मन्दिरमा १० फिटको बेसमा, २१ फिटको मूर्ति राखिएको सन्धिसर्क नगरपालिकाका प्रमुख प्रशासकीय अधिकृत खुमलाल भुसालको भनाइ छ ।
मुर्ति प्रतिस्थापन संगै मन्दिर तथा पौवा निर्माण गरिएको छ । दरवार तथा मन्दिर वरिपरि चिटिक्क पारिएको छ । लिच्छवी काल देखिनै दरबार तथा मन्दिरमा पुजाआजा हुदै आइहेको छ ।
लुम्बिनीमा आएका पर्यटकहरू तथा अर्घाखाँचीकै धार्मिक पर्यटकीय स्थल सुपा देउरालीमा आएका पर्यटकहरूलाई सदरमुकाम सन्धिखर्क हुँदै अर्घामा लैजान एसियाकै सबैभन्दा ठूलो भगवती देवीको मूर्ति स्थापना गरिएको सन्धिखर्क नगरपालिकाका नगर प्रमुख कृष्ण प्रसाद श्रेष्ठले बताए । सन्धिखर्क नगरपालिकाका पूर्व नगर प्रमुख कमलप्रसाद भुसालले उक्त मूर्ति स्थापना गर्न पहल गरेका हुन्।
गौतम बुद्धको जन्म स्थल लुम्बिनीसँगै गुल्मीको रेसुंगा र प्युठानको स्वर्गद्वाराीमा आएका पर्यटकहरूलाई अर्घा दरबारमा लैजाने उद्देश्यले मूर्ति स्थापना गरिएको नगर प्रमुख श्रेष्ठको भनाइ छ ।
