अर्घाखाँची । अर्घाखाँचीका प्रमुख जिल्ला अधिकारी बाबुराम अर्यालले जिल्लामा शान्ति सुरक्षालाई मजबुत बनाउने प्रतिबद्धता जनाएका छन्।
जिल्ला प्रशासन कार्यालयमा आयोजित पत्रकारहरूसँगको परिचयात्मक कार्यक्रममा बोल्दै उनले जिल्लाको शान्ति सुरक्षा अवस्थालाई थप सुदृढ बनाउनका लागि आफूले विशेष योजना र कार्यक्रम अघि बढाउने उल्लेख गरे। प्रमुख जिल्ला अधिकारी अर्यालले जिल्लामा कानूनी शासनको कार्यान्वयन, नागरिक सुरक्षामा सुधार, र विकासका परियोजनाहरूलाई सफलतापूर्वक सम्पन्न गराउनका लागि स्थानीय प्रशासन र सुरक्षा निकायबीच सघन समन्वय कायम गरिने बताए।
साथै, पत्रकारहरूसँग सहकार्य गर्दै, उनीहरूले उठाएका समस्याहरूलाई सम्बोधन गर्ने र सत्यतथ्य समाचार सम्प्रेषणका लागि प्रशासनको तर्फबाट आवश्यक सहयोग गरिने पनि उनले प्रतिबद्धता जनाए। अर्यालले पत्रकारिता र प्रशासनबीचको समन्वयले जनहितमा प्रभावकारी भूमिका खेल्न सक्ने विश्वास व्यक्त गरे।
पत्रकारहरूका तर्फबाट विभिन्न प्रश्नहरूको उत्तर दिँदै, उनले स्थानीय प्रशासनको प्राथमिकता शान्ति सुरक्षा, कानुनी शासनको सुदृढीकरण, र विकासका कामहरूलाई तीव्रता दिने रहेको बताए।
