अर्घाखाँची । अर्घाखाँचीको पाणिनी गाउँपालिकामा गठित शिक्षा समिति प्रति असन्तुष्टि जनाउदै नेकपा माओवादी केन्द्र पाणिनि र रास्वपा पाणिनीले गाउँपालिकामा संयुक्त विज्ञप्ति बुझाएका छन ।
मौखिक रुपमा सुझाव दिदैँ आएको भएपनि सुनवाई नभएपछि बाध्य भएर ज्ञापनपत्र बुझाउनु परेको उनीहरूको दावी छ । नवगठित शिक्षा समिति काँग्रेस एमालेको कार्यकर्ता भर्तीकेन्द्र जस्तै भएको उनीहरूको आरोप छ । शिक्षा समिति बनाउदा सबै राजनीतिकदलहरूसँग समन्वय नगरी हतारहतार बनाएको भन्दै उक्त गठित समिति खारेज गरी सर्वदलीय र सर्वपक्षीय बनाउनु पर्ने उनीहरूको माग रहेको छ ।
पाणिनीभित्र देखिएका तमाम प्रकारका बेथितिहरुमा पालिका प्रशासन तथा कार्यपालिका रमिते बनेको विज्ञप्तिमा उल्लेख गरिएको छ । बाटोघाटो खन्ने नाममा कार्यकर्ता र ठेकेदार पोस्ने, कालोबजारी नियमन गर्न नसक्नु, दैनिक रुपमा विदेशिने क्रमलाई रोक्न नसक्नु, कृषि क्षेत्र अस्त व्यस्त हुनु, पाणिनि गाउँपालिकाको कुल ग्राहस्थ उत्पादन घट्नु लगायतका घटनाले पालिका नै अस्तव्यस्त भएको दावी गरेका छन् । पालिका प्रशासनको कार्यशैलीप्रति असन्तुष्टि जनाउँदै दुइ राजनैतिक दलहरूले गम्भीर ध्यानाकर्षण गराएका छन्। उनीहरूले पालिकाले आफ्नो माग सम्बोधन नगरे कडा आन्दोलनमा जाने चेतावनीसमेत दिएका छन्।
ज्ञापनपत्र बुझ्दै पाणिनि गाउँपालिकाका प्रमुख प्रशासकीय अधिकृत रोमनाथ न्यौपानेले सुझाव तथा मागहरूको सम्बोधनका लागि समन्वयकारी भूमिका निर्वाह गर्ने प्रतिबद्धता व्यक्त गरेका थिए ।
पाणिनी गाउँपालिकाले २०८१ असोज २० गते कार्यपालिकाको बैठकबाट शिक्षा समितिको गठन गरेको थियो ।कार्यक्रममा माओवादी केन्द्रका भोजराज घिमिरे, बुद्धि घिमिरे, सौकत अली, तथा रास्वपाका माधवराज पोखरेल, र बाबुराम घिमिरे लगायतका नेता, पत्रकार लगायतको उपस्थिति रहेको थियो ।
