अर्घाखाँची । जिल्ला प्रशासन कार्यालय अर्घाखाँचीले राति ९ बजेपछि देउसी-भैलो खेल्न प्रतिबन्ध लगाएको छ।
प्रशासनले एक सूचना जारी गर्दै सो प्रतिबन्ध लगाएको हो । जिल्ला प्रशासनका अनुसार, देउसी-भैलो तथा तिहारका अन्य गतिविधिमा आवश्यक सजगता अपनाउनु पर्ने र कुनै पनि प्रकारका अशान्ति र अव्यवस्थित गतिविधि हुन नदिनका लागि यो प्रतिबन्ध लगाइएको जनाएको हो । जिल्ला प्रशासन कार्यालयले परम्परागत रुपमा चलिआएको सँस्कृतिको जगेर्ना गर्दै मर्यादित तथा अनुशासित भएर देउसी भैलो खेल्न भनेको छ ।
प्रशासनले पटाका, आतिशबाजी, जुवा, तास मादक पदार्थ सेवनलगायतका गतिविधिमा संलग्न नहुन समेत सबैमा अनुरोध गरेको छ। यदि यस्तो कार्यहरूमा संलग्न पाइए कानुनी कारबाही गरिने चेतावनी समेत प्रशासनले दिएको छ ।
