अर्घाखाँची । अर्घाखाँचीमा पछिल्लो पाँच महिनामा ३ हजार ८१ जनाले राहदानी बनाएका छन् ।
जिल्ला प्रशासन कार्यालय अर्घाखाँचीको तथ्याङ्क अनुसार २०८१ को श्रावण देखी २०८१ को मंसिर मसान्तसम्ममा सामान्य सिफारिस तर्फ ३ हजार १४ जना र दुर्त सेवा सिफारिस तर्फ ६७ जना गरी ३ हजार ८१ जनाले राहदानी बनाएका छन् ।
यो तथ्याङ्क अनुसार जिल्लामा दैनिक २५ जना भन्दा बढिले राहदानी बनाउने गरेका छन् । पछिल्लो समय दैनिक २५–३० जनाको हाराहारीमा सेवाग्राही राहदानीका लागि कार्यालय आउने गरेका जिल्ला प्रशासन कार्यालय अर्घाखाँचीका प्रशासकीय अधिकृत नुमलाल पन्थीले बताए ।
“केही युवा पिँढी अध्ययनका लागि र केही वैदेशिक रोजगारीका लागि राहदानी बनाउन आउने गरेका छन् ।” उनले भने, “कार्यालयमा गत वर्षको तुलनामा यस वर्ष राहदानी बनाउन आउनेको सङ्ख्या बढ्दै गएको छ ।”
२०८१ को मंसिरमा मात्रै सामान्य सिफारिस तर्फ ४ सय ६४ र द्रुत सेवा सिफारिस तर्फ १५ गरि ४ सय ७९ जनाले राहदानी बनाएको अधिकृत पन्थीले जानकारी दिए ।
