अर्घाखाँची । पाणिनी गाउँपालिकामा आयोजित आठौं पाणिनी कृषि, पर्यटन, उद्योग, र व्यापार महोत्सवको भव्य रूपमा उद्घाटन गरिएको छ। स्थानीय उत्पादन, पर्यटन प्रवर्द्धन, तथा व्यवसायिक गतिविधिहरूलाई प्रवर्धन गर्ने उद्देश्यले आयोजना गरिएको महोत्सवको उद्घाटन प्रमुख अतिथि लुम्बिनी प्रदेशसभा सदस्य रामजी प्रसाद घिमिरेले गरेका हुन्।
उद्घाटन समारोहमा प्रमुख अतिथि घिमिरेले स्थानीय स्रोतसाधनको प्रभावकारी उपयोग गर्दै आत्मनिर्भर अर्थतन्त्रको विकास गर्न यस्ता महोत्सवहरू महत्वपूर्ण हुने बताए। उनले महोत्सवले कृषक, व्यवसायी, तथा पर्यटन क्षेत्रका लागि नयाँ अवसर सिर्जना गर्ने विश्वास व्यक्त गरे।
महोत्सवमा स्थानीय कृषि उत्पादनहरूको प्रदर्शनी, हस्तकला सामग्री, घरेलु तथा लघु उद्योगका उत्पादनहरू, पर्यटन प्रवर्द्धनका स्टलहरू, तथा व्यापारिक सामग्रीहरू प्रदर्शन गरिएका छन्। यसका साथै सांस्कृतिक कार्यक्रम, नृत्य, तथा मनोरञ्जनात्मक प्रस्तुतीकरणहरू समेत समावेश गरिएको छ।
मुख्य आयोजक भिजन लुम्बिनी इन्टरटेन्टमेण्ट प्रालिका महासचिव बसन्त केसीले महोत्सवको तयारी, उद्देश्य, र यसले दिने अवसरबारे प्रकाश पार्दै स्थानीय कला, संस्कृति, र व्यवसाय प्रवर्द्धनमा सहयोग पुर्याउने बताए। उनले महोत्सवमा स्थानीय उत्पादनलाई बजारसँग जोड्ने प्रयास भइरहेको जानकारी दिए।
महोत्सवमा बोल्ने बक्ताहरुले महोत्सवको सफलताको शुभकामना ब्यक्त व्यक्त गरेका थिए । कार्यक्रममा स्थानीयबासी, व्यापारी, कृषक, तथा उद्योगीहरूको उल्लेखनीय सहभागिता रहेको छ। पर्यटकहरूका लागि विशेष पर्यटन प्रवर्द्धन स्टल राखिएको छ, जसमा पाणिनी गाउँपालिकाका ऐतिहासिक तथा प्राकृतिक स्थलहरूको प्रचारप्रसार गरिँदैछ।
कार्यक्रम पाणिनि पर्यटन समाजका अध्यक्ष झविन सुनामको अध्यक्षता, उपाध्यक्ष ध्रुव घिमिरेको स्वागत मन्तब्य र सहसचिव मधु पन्तको संचालनमा सम्पन्न भएको थियो । आयोजकहरूका अनुसार महोत्सव आगामी १८ गतेसम्म जारी रहनेछ । यस महोत्सवले कृषि, पर्यटन, उद्योग, तथा व्यापार क्षेत्रका लगानीकर्ताहरूलाई नयाँ सम्भावनाहरू खोज्न मद्दत गर्ने विश्वास गरिएको छ।
७ गतेका आकर्षणहरु
