अर्घाखाँची । पाणिनि गाउँपालिका वडा नं. ५ मा निर्माणाधीन १५ शैय्याको अस्पतालको अनुगमन सम्पन्न भएको छ।
गाउँपालिकाका प्रमुख प्रशासकीय अधिकृत रोमनाथ न्यौपानेको नेतृत्वमा गरिएको अनुगमन टोलीमा गाउँपालिकाका इन्जिनियर मोहराज पौडेल, तत्कालीन लेखा प्रमुख बालकृष्ण आचार्यसहित कर्मचारीहरूको सहभागिता थियो।
अनुगमनका क्रममा प्रमुख प्रशासकीय अधिकृत न्यौपानेले निर्माण कार्यको प्रगति सन्तोषजनक रहेको भन्दै निर्माण कम्पनीलाई कामको गुणस्तरमा कुनै सम्झौता नगरी तोकिएको समयभित्र निर्माण सम्पन्न गर्न निर्देशन दिए।
“हालसम्म अस्पताल निर्माणको ८५ प्रतिशत काम सम्पन्न भइसकेको छ,” उनले भने, “बाँकी काम पनि तोकिएको समयसीमाभित्र सम्पन्न हुने विश्वास लिएको छु।”
उक्त अस्पताल निर्माण कार्य २०७९ साल असार ९ गते सुरु भएको हो भने निर्माण सम्पन्न गर्ने तोकिएको म्याद २०८२ साल असार ३ गतेसम्मको रहेको छ। स्थानीयवासीहरूका लागि गुणस्तरीय स्वास्थ्य सेवा उपलब्ध गराउने लक्ष्यसहित निर्माण भइरहेको यस अस्पतालले पाणिनि गाउँपालिकाको स्वास्थ्य पूर्वाधारमा महत्वपूर्ण योगदान दिने अपेक्षा गरिएको छ।
