अर्घाखाँची । पाणिनि गाउँपालिका स्तरीय भूमि समस्या सहजीकरण समितिको बैठक सम्पन्न भएको छ।
समितिका संयोजक तथा गाउँपालिका अध्यक्ष टेकराज न्यौपानेको अध्यक्षतामा बसेको बैठकले गाउँपालिकाभरिका भूमिहीन सुकुम्बासी, भूमिहीन दलित गरि २५ घरपरिवारलाई सूचीबद्ध गर्ने निर्णय गरेको हो।
स्थानीय तहमा भूमि समस्या समाधानका लागि सहजीकरण गर्न र आवश्यक तथ्यांक संकलन गर्न स्थानीय तह प्रमुखको नेतृत्वमा समिति गठन हुने व्यवस्था रहेको छ। सोही व्यवस्था अनुसार गठित समितिको यो बैठकले भूमिहीन तथा अव्यवस्थित बसोवासीहरूको पहिचान, लगत संकलन, प्रमाणीकरण तथा नाप नक्साजस्ता कार्यलाई प्रभावकारी बनाउन २५ परिवारलाई प्राथमिकतामा राखेर सूचीकरण गर्ने निर्णय गरेको जनाइएको छ। वडाहरुले सिफारिस गरि समितिमा पठाएका व्यक्ति तथा परिवारको सूचीकरण गर्ने णिर्णय भएको हो । जसमा पाणिनि गाउपालिका वडा नम्बर ३ का ३ घरपरिवार, वडा नम्बर ५ का ७ घरपरिवार, ६ का २ घरपरिवार, ७ का ३ घरपरिवार र ८ का १० घरपरिवार रहेका छन् ।
बैठकले भूमिहीन तथा सुकुम्बासीको अवस्था सुधार गर्न, उनीहरूको आवासीय अधिकार सुनिश्चित गर्न र योजनाबद्ध विकासमा समावेश गर्न यो कदमले सहयोग पुग्ने विश्वास व्यक्त गरेको छ। स्थानीय तहका प्रतिनिधिहरू, समिति सदस्यहरू, राजनैतिक दलका प्रतिनिधिहरु तथा सरोकारवालाहरूको सहभागितामा सम्पन्न यो बैठकले भूमिहीन र अव्यवस्थित बसोवासीको हक अधिकार संरक्षणमा सकारात्मक योगदान पुर्याउने अपेक्षा गरिएको छ।
अव्यवस्थित बसोबासिको हकमा भने समितीले पछि निर्णय गर्नेछ ।
