अर्घाखाँची । मनसुनको आगमनसँगै हुनसक्ने विपदको जोखिम न्यूनीकरण र प्रभावकारी व्यवस्थापनका लागि पाणिनि गाउँपालिका-स्तरीय बिपद व्यवस्थापन समितिको बैठक शुक्रबार सम्पन्न भएको छ। पालिका अध्यक्ष टेकराज न्यौपानेको अध्यक्षतामा बसेको बैठकले आगामी ३ वर्षका लागि पूर्व तयारी प्रतिकार्य योजना निर्माण गरेको छ।
बैठकमा बाढी, पहिरो, महामारी, आगलागी, हावाहुरी, डुवान, मानव-वन्यजन्तु द्वन्द्व र खडेरी जस्ता विपदका घटना न्यूनीकरण गर्न विशेष योजना बनाइएको छ। पछिल्लो १० वर्षको बिपद विश्लेषणको आधारमा तयार पारिएको यो योजना कार्यान्वयनका लागि समिति संकल्पित देखिएको छ। बैठकले विपद व्यवस्थापनका लागि आवश्यक सामग्री खरिद गर्ने र तत्कालै उपयोगमा ल्याउने निर्णय समेत गरेको छ।
बैठकमा सहभागीहरुले विपदका घटना शून्यमा ल्याउन नसकेपनि न्यूनीकरण गर्न सबै तहमा पहल गर्ने प्रतिबद्धता व्यक्त गरे।
सात सदस्यीय विपद उद्धार तथा प्रतिकार्य कार्यदल गठन
बैठकले विपद उद्धार तथा प्रतिकार्य कार्यदल समेत गठन गरेको छ।
सात सदस्यीय कार्यदलको नेतृत्व वडा नं. ४ का अध्यक्ष हरि प्रसाद घिमिरेले गरेका छन्। सदस्यहरुमा पूर्वाधार शाखा प्रमुख मोहराज पौडेल, स्वास्थ्य शाखा प्रमुख शेषकान्त घिमिरे, प्रशासन प्रमुख कमल न्यौपाने, रेडक्रस मैदानका सभापति गणेश घिमिरे, प्रहरी चौकी पाली/खिदिम र पत्रकार भिम विश्वकर्मा रहेका छन्।
स्थानीय तहमा यस्तो प्रभावकारी योजना र सक्रिय कार्यदल गठनले विपद न्यूनीकरण र व्यवस्थापनमा नयाँ उचाइ थप्ने विश्वास लिइएको छ।
