अर्घाखाँची । चालु आर्थिक वर्ष २०८१/८२ को समाप्तिसम्म पाणिनि गाउँपालिकाले ८७ प्रतिशत बजेट खर्च गरेको जनाएको छ। गाउँपालिकाका अनुसार चालु तथा पूँजीगत दुवै खाले बजेटमा सन्तोषजनक खर्च भएको छ।
गाउँपालिकाले सार्वजनिक गरेको तथ्याङ्कअनुसार चालु तर्फ ८७.१९ प्रतिशत र पूँजीगत तर्फ ८९.८३ प्रतिशत बजेट खर्च भएको छ। समग्रमा ८७. ८६ प्रतिशत वित्तीय प्रगति हासिल भएको हो। गाउँपालिकाले ६६ करोड २३ लाख ९४ हजार रुपैयाको बजेट पेश गरेको थियो । जसमध्ये ९४.३८ प्रतिशत बजेट आर्थत ६२ करोड ५२ लाख ५ हजार ८२ रुपैया ८५ पैसा पालिकालाई आम्दानी भएको पालिकाको तथ्याङ्क छ ।
प्रमुख प्रशासकीय अधिकृत रोमनाथ न्यौपानेका अनुसार चालु आर्थिक वर्षको सुरुवातमै योजनाको छनोट, सम्झौता र अनुगमन प्रणालीलाई सुदृढ पारिएकाले प्रगति राम्रो भएको हो । उनले भने, “पछिल्ला वर्षहरूसँग तुलना गर्दा यो वर्षको खर्चको गति राम्रो रह्यो। आगामी वर्षमा यो प्रगति अझै बढाउने योजनामा छौं।”
गाउँपालिकाले शिक्षा, स्वास्थ्य, कृषि, पूर्वाधार र रोजगारीमूलक कार्यक्रमहरूमा प्राथमिकता दिँदै बजेट खर्च गरेको बताइएको छ।
