अर्घाखाँची । अर्घाखाँचीको भुमिकास्थान नगरपालिका–१० तल्लोपाकुमा पहिरोले पुरिएर दुईजनाको मृत्यु भएको छ।
मंगलबार बिहान करिब ९ बजेतिर घाँस काट्न र चिउरी टिप्न गएका स्थानीय ६६ वर्षीय गोबिन्द बुढामगर र उनकी ६७ वर्षीया श्रीमती श्यामकला बुढामगरको पहिरोले पुरिँदा ज्यान गएको जिल्ला प्रहरी कार्यालय अर्घाखाँचीले जनाएकाे छ ।
उनीहरू रोजा तुसारेपानीस्थित आफ्नै खर्यानतर्फ गएका थिए। तर समयमै घर नफर्किएपछि खोजीका लागि परिवारले प्रहरीलाई खबर गरेका थिए।
स्थानीयवासीहरूको सहयोगमा खोजतलास गर्ने क्रममा उनीहरू सुक्खा पहिरोले पुरिएको अवस्थामा फेला परेका थिए। ढुंगा लागेर शरीरका विभिन्न भागमा गम्भीर चोट लागेका कारण घटनास्थलमै दुवैजनाको मृत्यु भएको जिल्ला प्रहरी कार्यालय अर्घाखाँचीका सूचना अधिकारि प्रहरी निरीक्षक झलकप्रसाद शर्माले जानकािर दिए ।
कानूनी प्रक्रिया पूरा गरी शवलाई पोस्टमार्टमका लागि जिल्ला अस्पताल अर्घाखाँची पठाइएको छ। घटनाको थप अनुसन्धान भइरहेको प्रहरीले जनाएको छ।
