अर्घाखाँची । नेपालका प्रथम जननिर्वाचित प्रधानमन्त्री तथा नेपाली कांग्रेसका संस्थापक महामानव वि.पि. कोइरालाको ४३ औं स्मृति दिवसको अवसरमा नेपाली कांग्रेस पाणिनीले विशेष कार्यक्रमसहित वृक्षारोपण सम्पन्न गरेको छ।
पाणिनी गाउँपालिका–३ स्थित दुर्गाफाँटमा रहेको वि.पि. बाटिकामा आयोजित उक्त कार्यक्रममा नेपाली कांग्रेस अर्घाखाँचीका सचिव अच्युत गौतम, कांग्रेस नेता यादव प्रसाद घिमिरे, काँग्रेस पाणिनिका सभापती तुल्सी पौडेल, गाउँपालिका अध्यक्ष टेकराज न्यौपाने, पाणिनि गाउँपालिका प्रमुख प्रशासकीय अधिकृत रोमनाथ न्यौपाने, वडा नं. २, ३ र ६ का वडाध्यक्षहरू लगायत कांग्रेसप्रति आस्था राख्ने स्थानीयको उल्लेख्य सहभागिता देखिएको थियो।
कार्यक्रममा पुराना विरुवाको संरक्षण तथा सरसफाई गरि नयाँ फलफुलका बिरुवा रोपिएका छन्। कार्यक्रममा बोल्दै नेता यादव प्रसाद घिमिरेले वि.पि. कोइरालाले मुलुकमा प्रजातन्त्रको स्थापनाका लागि गरेका संघर्षहरूलाई स्मरण गर्दै वर्तमान पुस्ताले उनको विचारलाई आत्मसात् गर्नुपर्ने बताए। उनले प्रजातान्त्रिक मूल्य, मानवअधिकार र सामाजिक न्यायका लागि विपिले खेलेको भूमिकालाई आजका सन्दर्भमा समेत सान्दर्भिक रहेको बताए।
गाउँपालिका अध्यक्ष टेकराज न्यौपानेले फरक विचारधाराका भए पनि बीपी कोइराला सबै राजनीतिक कार्यकर्ताका लागि प्रेरणाका स्रोत भएको उल्लेख गरे। उनले बीपीको दर्शन र मार्गदर्शन आज पनि सान्दर्भिक भएको भन्दै योगदान सम्झेर सबैले समाज सुधारमा हातेमालो गर्नेमा जोड दिए । उनले प्रजातन्त्र, मानवअधिकार र राष्ट्रिय एकताको पक्षमा वि.पि.को योगदान सदैव सम्माननीय रहने बताए ।
कार्यक्रमले बीपीको स्मृतिमा प्रकृति संरक्षणको सन्देश दिनुको साथै राजनीतिक एकताको पनि सन्देश दिएको सहभागीहरूले बताएका छन्।
