अर्घाखाँची । पाणिनि गाउँपालिकाले लैंगिक हिंसा विरुद्धको १६ दिने अभियानअन्तर्गत कानुनी परामर्श तथा अन्तरक्रिया कार्यक्रम गरेको छ। कार्यक्रममा गाउँपालिका अध्यक्ष टेकराज न्यौपानेले लैंगिक हिंसा अन्त्यका लागि व्यक्तिगत रूपमा आफैँबाट सुरुवात आवश्यक रहेको बताएका छन्।
उनले लैंगिक हिंसाका घटनाहरू घटाउन घर–परिवार, समाज र संस्थात्मक तहबाट समान रूपमा पहल र व्यवहार परिवर्तन अनिवार्य रहेको बताए । न्यौपानेले भने “लैंगिक हिंसा नेपालको सन्दर्भमा अब सान्दर्भिक नरहेको, तर अझै पनि विभिन्न रूपमै हिंसा लुकेरै भइरहेको छ । त्यसैले सचेतना, सूचना प्रवाह र सुरक्षित वातावरण निर्माण अत्यन्तै आवश्यक छ।”
उनका अनुसार पाणिनि गाउँपालिकाले महिलामैत्री, बालमैत्री र ज्येष्ठ नागरिकमैत्री नीतिहरू कार्यान्वयन गर्न विभिन्न सरोकारवाला संस्थासँग सहकार्य गर्ने योजना बनाएको छ।
