काठमाडौं । विश्व हिन्दु युवा संघ-राष्ट्रिय तथा अन्तर्राष्ट्रिय समितिको आयोजनामा यहि पौष २७ गतेका दिन “शिबगोरक्ष-पृथ्वीनारायण शाह र गोर्खा साम्राज्य” विषयक विचार गोष्ठी आयोजना हुने भएको छ ।
इतिहास, दर्शन, राष्ट्रनिर्माण र समकालीन विमर्शलाई एउटै मञ्चमा समेट्ने उद्देश्यसहित उक्त विचार गोष्ठी आयोजना हुने भएको छ । गोष्ठीले गोर्खा साम्राज्यको ऐतिहासिक यात्रा, पृथ्वीनारायण शाहको राष्ट्रनिर्माण दृष्टि तथा त्यसको समकालीन अर्थ र प्रभावमाथि गम्भीर बहस गर्ने अपेक्षा गरिएको आयोजकले जनाएका छन् ।
गोरक्षपीठ, मृगस्थलीमा स्थान तय गरिएको उक्त विचार गोष्ठीमा विभिन्न क्षेत्रका विज्ञ, अध्येता, अभियन्ता र विश्लेषकहरूको सहभागिता रहनेछ । कार्यक्रममा प्रा. डा. विद्यानाथ कोइराला, डा. हरिप्रसाद सोडारी, सह–प्राध्यापक डिल्ली निरौला, पत्रकार तथा विश्लेषक अर्जुन ज्ञवाली, अर्थविद् डा. शम्भु पोखरेल, गुठी अभियन्ता अधिवक्ता अनिस बैद्य, हिन्दु अभियन्ता अभिषेक जोशी तथा किराँत मोर्चाका महासचिव सौजन किरात वक्ताका रूपमा सहभागी हुनेछन् ।
गोष्ठीमा पृथ्वीनारायण शाहको राजनीतिक दर्शन, सांस्कृतिक एकीकरण, आर्थिक आधार, गुठी व्यवस्था, धर्म–संस्कृतिको भूमिका र वर्तमान राष्ट्रराजनीतिसँग यसको सम्बन्धमाथि बहुआयामिक छलफल हुने जनाइएको छ । आयोजकले इतिहासलाई केवल अतीतको विषय नभई वर्तमान र भविष्यको मार्गदर्शकका रूपमा बुझ्न यो गोष्ठी महत्वपूर्ण हुने विश्वास व्यक्त गरेका छन् ।
