काठमाडौं । नेपाली कांग्रेसकि केन्द्रीय सदस्य नेतृ पुष्पा भुसालले पार्टीभित्र देखिएको अन्योल र विवादलाई अन्त्य गर्दै विशेष महाधिवेशन अनिवार्य रूपमा हुने स्पष्ट पारेकी छन्।
उनले काठमाडौंमा अर्घाखाँची युथ कांग्रेसद्वारा आयोजित छलफल कार्यक्रममा बोल्दै विधानले दिएको अधिकार प्रयोग गर्दै विशेष महाधिवेशन गरिनु अपरिहार्य भएको बताउँदै यस विषयमा कुनै सम्झौता नहुने धारणा व्यक्त गरिन्।
भुसालले भनिन्, “इन्तु, किन्तु, परन्तु केही चल्दैन। विशेष महाधिवेशन हुन्छ। यो पार्टी विधानले दिएको अधिकार हो।” पार्टीभित्रको आन्तरिक लोकतन्त्र बलियो बनाउन र वैधानिक प्रक्रिया पूरा गर्न विशेष महाधिवेशन आवश्यक रहेको उनको भनाइ थियो।
उनले वर्तमान राजनीतिक परिस्थितिमा अन्य पार्टीका नेतालाई प्रधानमन्त्री स्वीकार गर्न कांग्रेस तयार नरहेको स्पष्ट पार्दै पार्टीको स्वाभिमान र सिद्धान्तमा कुनै सम्झौता नगर्ने बताइन्। “अरू पार्टीको नेतालाई प्रधानमन्त्री मान्न हामी तयार छैनौं,” भुसालले जोड दिइन्।
नेतृ भुसालले विधान बमोजिम महाधिवेशन प्रतिनिधिहरूको अधिकार सुरक्षित गर्न केन्द्रिय समितिले हरसम्भव प्रयास गर्ने विश्वास व्यक्त गरिन्। प्रतिनिधिहरूको मत, अधिकार र भूमिकालाई कमजोर बनाउने कुनै पनि प्रयास स्वीकार्य नहुने उनको भनाइ थियो।
संस्थापन पक्षले महाधिवेशन ढिलो गर्ने भएपछि महामन्त्री गगन थापा र विश्वप्रकाश शर्माले पौष २७ र २८ गते विशेष महाधिवेशनको तयारी गरेका छन ।
महाधिवेशन स्थल भृकुटीमण्डपमा नेता कार्यकर्ताको चहलपहल बढेको छ ।
