- अर्घाखाँचीमा १०२ मतदान स्थलमध्ये २५ वटालाई अतिसंवेदनशील सूचीमा राखिएको छ।
- सुरक्षा अवस्था र भौगोलिक बनावटका आधारमा जिल्लाका सबै मतदान स्थलको वर्गीकरण गरिएको छ।
- निर्वाचनमा १ लाख ७१ हजार ६५२ मतदाताले १५ जना उम्मेदवारका लागि मतदान गर्नेछन्।
अर्घाखाँची । आगामी फागुन २१ गते हुने प्रतिनिधि सभा सदस्य निर्वाचनमा अर्घाखाँचीका २५ वटा मतदानस्थललाई अतिसंवेदनशीलको सूचीमा राखिएको छ ।
जिल्लामा रहेका कुल १०२ मतदान स्थलमध्ये ३७ वटा संवेदनशील र ४० वटा सामान्य सूचीमा परेका छन् ।
जिल्ला सुरक्षा समितिले जिल्लाका सबै मतदान स्थलको अवस्था मूल्यांकन गरी सुरक्षाको अवस्था, भौगोलिक बनावट र विगतका गतिविधिलाई आधार मानेर सबै मतदानस्थललाई अतिसंवेदनशील, संवेदनशील र सामान्य गरी तीन तहमा वर्गीकरण गरेको अर्घाखाँचीका सहायक प्रमुख जिल्ला अधिकारी झविलाल भट्टराइले जानकारी दिए ।
निर्वाचनलाई स्वच्छ, निष्पक्ष र भयरहित वातावरणमा सम्पन्न गर्नका लागि राजनीतिक दल, उम्मेदवार र स्वतन्त्र उम्मेदवारहरूले प्रतिबद्धता जनाएको पनि प्रशासनले जनाएको छ ।
एक मात्र निर्वाचन क्षेत्र रहेको अर्घाखाँचीमा १ सय २ मतदान स्थलमा यसपटक २ सय ९ मतदान केन्द्र तोकिएका छन् ।
प्रतिनिधि सभा निर्वाचन २०८२ मा अर्घाखाँचीबाट एक लाख ७१ हजार ६ सय ५२ मतदाताले मतदान गर्न पाउनेछन् भने विभिन्न राजनैतिक दल र स्वतन्त्र गरि १५ जना उम्मेदवार प्रतिस्पर्धामा रहेका छन् ।।
