नेपाली कांग्रेस भुमिकास्थान नगर समितिले आयोजना गरेको अन्तरक्रिया कार्यक्रमलाई सम्बोधन गर्दै उम्मेदवार मुस्कानले आफू जनताबाट टाढा नभई अर्घाखाँचीकै जनतासँग जिल्लामै बसेर काम गर्ने बताएका हुन् । उनले विकास निर्माणका योजनाको काम र सदनको बैठकका समय बाहेक अधिकांश समय जिल्लामै रहने स्पष्ट पारे ।
कार्यक्रममा उनले भने, “म तपाईँहरूसँगै जिल्लामै बसेर यहाँको विकास निर्माण र समस्याको समाधानका विषयमा तपाईँहरूसँगै छलफल गर्दै अघि बढ्नेछु ।”
उम्मेदवार मुस्कानले आफू कुरा भन्दा काम गरेर देखाउने व्यक्ति भएको दाबी गर्दै जिल्लाका आम समस्याको समाधानका लागि विगतमा पनि सक्रिय रहेको र आगामी दिनमा अझ प्रभावकारी ढंगले लागिरहने बताए । उनले जिल्लामै रोजगारी सिर्जना, कृषिमा आधुनिकीकरण, बजार व्यवस्थापन, पर्यटन प्रवर्द्धन, बादर र बनेल नियन्त्रण, खानेपानी, स्वास्थ्य र निःशुल्क शिक्षा जस्ता विषयमा नीति निर्माणका लागि सदनमा बलियो आवाज उठाउने प्रतिबद्धता व्यक्त गरे ।
उनले अहिलेको आवश्यकता चुनाव जित्नु भएको उल्लेख गर्दै जिल्लावासी सबैलाई मतदानमा सहभागी भई सहयोग गर्न आग्रह समेत गरे ।
