- अर्घाखाँचीको प्रतिनिधि सभा निर्वाचनमा रास्वपाका हरिप्रसाद भुसाल ३५ हजार २३ मतसहित विजयी भएका छन्।
- उनले निकटतम प्रतिद्वन्द्वी एमालेका पिताम्बर भुसाललाई १२ हजारभन्दा बढी मतान्तरले पराजित गरेका हुन्।
- सन्धिखर्कका व्यवसायी तथा लेखक भुसाल यसअघि २०७९ को निर्वाचनमा पनि उम्मेदवार रहेका थिए।
अर्घाखाँची । एक मात्र निर्वाचन क्षेत्र रहेको अर्घाखाँचीमा राष्ट्रिय स्वतन्त्र पाटीका हरि प्रसाद भुसाल ३५ हजार २३ मतका साथ विजयी भएका छन् । निकटतम प्रतिद्धन्दी नेकपा एमालेका पिताम्बर भुसालभन्दा १२ हजार भन्दा बढी मतान्तरले विजयी भएका हुन् ।
उनका निकटतम प्रतिद्धन्दी नेकपा एमालेका पिताम्बर भुसालले २२ हजार ६ सय ४९ , नेपाली कांग्रेसका विष्णु प्रसाद खनाल (मुस्कान) ले १८ हजार २ सय ९७, नेपाली कम्युनिष्ट पार्टीका रामबहादुर चौहानले ३ हजार ८ सय ४७ , मत प्राप्त गरेका छन् ।
राष्ट्रिय स्वतन्त्र पार्टीका जिल्ला अध्यक्ष हरिप्रसाद भुसाल रास्वपाको जिल्ला संगठन बनाउन तथा गाउँगाउँमा रास्वपाको समिती निर्माण गर्न सुरुदेखि नै लागेका थिए । भुसाल २०७९ सालको प्रतिनिधि सभामा पनि रास्वपाबाटै उम्मेदवार रहेका थिए । उनले २०७९ सालको निर्बाचनमा ३२ सय मत ल्याएका थिए ।
३७ वर्षीय भुसाल सन्धिखर्कमा मिडिया सञ्चालक, लेखक र आर्टस् व्यवसाय गर्दै आएका छन् । लायन्स क्लब अर्घाखाँचीको संस्थापक अध्यक्ष रहेका भुसाल, अर्घाखाँची चेम्बर अफ कमर्सका महासचिव समेत रहेका छन् । उनी प्रष्ट र यथार्थ बोल्ने हकी स्वभावका युवा हुन् ।
अर्घाखाँचीमा १ लाख ७१ हजार ६ सय ५२ मतदाता थिए । निर्वाचनमा ८६ हजार ६६८ मत खसेको थियो । जसमध्ये महिला ४७ हजार ६ सय ८८ र पुरूष ३८ हजार ९ सय ८० मतदाताले निर्वाचनमा भाग लिएका थिए ।
