अर्घाखाँची । देशभर प्रतिनिधिसभा निर्वाचन २०८२ को मत परिणाम सार्वजनिक हुँदै जाँदा राष्ट्रिय स्वतन्त्र पार्टी (रास्वपा) झन्डै दुई तिहाई नजिक पुगेको देखिएको छ।

लुम्बिनी प्रदेशमा पनि रास्वपाको उल्लेख्य प्रभाव देखिएको छ। प्रदेशका १२ जिल्लामध्ये अधिकांश जिल्लामा रास्वपाले बलियो पकड जमाएको छ।

प्रदेशका २६ प्रतिनिधिसभा निर्वाचन क्षेत्रमध्ये रास्वपाले २१ क्षेत्रमा जित निकाल्दै प्रदेशकै ठूलो राजनीतिक शक्तिको रूपमा उदाएको छ। साथै प्रदेशका ७ जिल्लामा रास्वपाले क्लिनस्विप गरेको छ।

अर्घाखाँची, गुल्मी, रुपन्देही, प्युठान, बर्दिया, नवलपरासी (बर्दघाट सुस्ता पश्चिम) र दाङ जिल्लामा रास्वपाले सबै निर्वाचन क्षेत्रमा जित निकाल्दै क्लिनस्विप गरेको हो।

एक मात्र निर्वाचन क्षेत्र रहेका अर्घाखाँची र प्युठानमा रास्वपाले सहज जित निकालेको छ भने दुई–दुई निर्वाचन क्षेत्र रहेका गुल्मी, बर्दिया र नवलपरासी (बर्दघाट सुस्ता पश्चिम) मा पनि सबै सिट आफ्नो पक्षमा पारेको छ। त्यस्तै तीन निर्वाचन क्षेत्र रहेको दाङ र पाँच निर्वाचन क्षेत्र रहेको रुपन्देहीमा पनि रास्वपाले सबै क्षेत्रमा विजय हासिल गरेको छ।

यसैगरी पाल्पा क्षेत्र नं. २, कपिलवस्तु क्षेत्र नं. १ र २ तथा बाँके क्षेत्र नं. १ र ३ मा समेत रास्वपाले जित हात पार्दै लुम्बिनी प्रदेशमा कुल २१ सिट जित्न सफल भएको छ।

यस परिणामसँगै लुम्बिनी प्रदेशमा रास्वपा सबैभन्दा ठूलो शक्तिको रूपमा स्थापित भएको छ। विशेषगरी युवा मतदाताको आकर्षण, सुशासन र नयाँ राजनीतिक विकल्पको एजेण्डालाई केन्द्रमा राखेर चुनावी अभियान चलाएको रास्वपाले लुम्बिनी प्रदेशमा व्यापक जनसमर्थन पाएको हाे । परम्परागत रूपमा नेपाली कांग्रेस, नेकपा एमाले र माओवादी केन्द्रको प्रभाव रहेको क्षेत्रमा रास्वपाले उल्लेख्य मतसहित जित निकाल्नु राजनीतिक समीकरणका लागि महत्वपूर्ण मानिएको छ।

लुम्बिनीमा कहाँ काे ?

पार्टी अनुसार सिट संख्या

रास्वपा ██████████████████████████████ 21
नेपाली कांग्रेस ██ 2
नेकपा ██ 2
एमाले █ 1