अर्घाखाँचीको मत विश्लेषण : मतदाताको रोजाइ दल कि उम्मेदवार ?

अर्घाखाँची । अर्घाखाँचीमा प्रतिनिधिसभा निर्वाचनको प्रत्यक्ष र समानुपातिक दुवै तर्फको मत परिणाम सार्वजनिक भइसकेको छ। सार्वजनिक मतपरिणामको आधारमा जिल्लामा मतदाताले पार्टीलाई रोजे कि उम्मेदवारलाई भन्ने विषयमा रोचक चित्र देखिएको छ।

जिल्लामा राष्ट्रिय पार्टीको मान्यता प्राप्त गरी थ्रेसहोल्ड कटाएका दलहरूको समानुपातिक मत र उनीहरूका उम्मेदवारले प्रत्यक्षतर्फ पाएको मतबीच तुलना गर्दा कतिपय ठाउँमा पार्टी बलियो देखिएको छ भने कतै उम्मेदवार नै मतदातामाझ लोकप्रिय देखिएका छन्। यसमा राष्ट्रिय स्वतन्त्र पार्टी (रास्वपा), नेपाली कांग्रेस, नेकपा एमाले, नेपाली कम्युनिस्ट पार्टी (नेकपा), राष्ट्रिय प्रजातन्त्र पार्टी र श्रम संस्कृति पार्टीका समानुपातिक मत र उम्मेदवारको मतबीच तुलना गरिएको छ ।

अर्घाखाँचीमा राष्ट्रिय स्वतन्त्र पार्टी (रास्वपा) ले समानुपातिकतर्फ ३९ हजार ८५ मत प्राप्त गरेको छ। तर प्रत्यक्षतर्फ रास्वपाका उम्मेदवार हरिप्रसाद भुसालले ३५ हजार २३ मत मात्रै प्राप्त गरेका छन्। यसले रास्वपामा उम्मेदवारभन्दा पार्टीप्रतिको आकर्षण केही बढी रहेको संकेत गर्छ।

नेकपा एमालेका प्रत्यक्ष उम्मेदवार पिताम्बर भुसालले २२ हजार ६४९ मत प्राप्त गरेका छन्। तर एमालेको समानुपातिक मत भने २० हजार ४५१ मात्रै रहेको छ। यसले प्रत्यक्षतर्फ एमाले उम्मेदवारले पार्टीको भन्दा केही बढी मत तानेको देखिन्छ। अर्थात् यहाँ उम्मेदवारको व्यक्तिगत प्रभाव पनि देखिएको छ।

नेपाली कांग्रेसका उम्मेदवार विष्णुप्रसाद खनाल ‘मुस्कान’ले प्रत्यक्षतर्फ १८ हजार ९८३ मत प्राप्त गरेका छन्। जबकि कांग्रेसले समानुपातिकमा १७ हजार ६८१ मत मात्रै पाएको छ। यसले कांग्रेसमा पनि पार्टीभन्दा उम्मेदवारको व्यक्तिगत लोकप्रियता केही बढी देखिएको संकेत गर्दछ।

नेपाली कम्युनिस्ट पार्टीले समानुपातिकमा ३ हजार ९७७ मत पाएको छ। उनको जमानतसमेत जफत भएको छ । तर सो पार्टीका उम्मेदवार रामबहादुर चौहानले प्रत्यक्षतर्फ ३ हजार ८४७ मत मात्रै पाए। यसले यहाँ उम्मेदवारभन्दा पार्टीप्रतिको मत केही बढी गएको देखाउँछ।

राष्ट्रिय प्रजातन्त्र पार्टीले समानुपातिकमा ७२५ मत प्राप्त गरेको छ। तर प्रत्यक्षतर्फ सो पार्टीका उम्मेदवार झबिन्द्र फुल्लेलले २४४ मत मात्रै पाए। उनको पनि जमानत जफत भएको छ। यसले पनि राप्रपामा उम्मेदवारभन्दा पार्टीका लागि गएको मत तुलनात्मक रूपमा बढी रहेको देखिन्छ।

राष्ट्रिय पार्टीको मान्यता पाएको अर्को दल श्रम संस्कृति पार्टीले भने अर्घाखाँचीमा प्रत्यक्षतर्फ उम्मेदवार उठाएको थिएन। तर उक्त पार्टीले समानुपातिक तर्फ ५ सय ७२ मत पाएकाे छ ।

समग्रमा हेर्दा अर्घाखाँचीमा केही दलमा पार्टीको प्रभाव बलियो देखिएको छ भने केहीमा उम्मेदवारको व्यक्तिगत प्रभावले मत तानेको स्पष्ट देखिन्छ।