अर्घाखाँची । जिल्ला ट्राफिक प्रहरी कार्यालय अर्घाखाँचीका प्रमुख सरोज केसीले सोमबार गोरुसिङ्गे–सन्धिखर्क सडकखण्डअन्तर्गत लाहुरे बजार क्षेत्रमा क्षमता भन्दा बढी ढुङ्गा बोकेका ट्रिपरहरूलाई सडकमै रोकेर कारबाही गरेका छन्।
दुर्घटना न्यूनीकरणका लागि स्वयं सडकमा खटिएका ट्राफिक प्रमुख केसीले ओभरलोड ट्रिपरका छतमा चढेर ढुङ्गा झार्दै नियम उल्लंघन गर्ने सवारीसाधनमाथि तत्काल कारबाही गरेका हुन्।
सो अवसरमा केसीले चालक तथा सहचालकलाई प्रशिक्षण समेत दिँदै क्षमता भन्दा बढी सामान ढुवानी गर्दा सडक संरचनामा गम्भीर क्षति पुग्ने र सवारीसाधन अनियन्त्रित भई दुर्घटना हुन सक्ने चेतावनी दिए। उनले कुनै पनि सवारीसाधनले तोकिएको क्षमताभन्दा बढी सामान नबोक्न आग्रह गरे।
ट्राफिक प्रमुख केसीका अनुसार सोमबारको अनुगमनमा क्षमता भन्दा बढी ढुङ्गा बोकेका १५ वटा ट्रिपर फेला परेका थिए। ती सबै सवारीसाधनका अतिरिक्त ढुङ्गा सडकमै झारेर आवश्यक कारबाही गरिएको उनले बताए।
अबदेखि क्षमता भन्दा बढी लोड बोकेर चल्ने चालक, सहचालक तथा सवारीधनीमाथि कडा कारबाही गरिने ट्राफिक प्रमुख केसीले स्पष्ट पारेका छन्।
