- कपिलवस्तुको महाराजगञ्जमा भएको झडपमा घाइते भएका २२ वर्षीय अरुण यादवको उपचारका क्रममा मृत्यु भएको छ।
- गत चैत ७ गते दुई समुदायबीच भएको विवाद नियन्त्रणमा लिने क्रममा प्रहरीको गोली लागेर उनी गम्भीर घाइते भएका थिए।
- सोही घटनामा संलग्न अन्य १० जनालाई मन्दिर तोडफोड र सामाजिक सञ्जालमा भ्रम फैलाएको आरोपमा पक्राउ गरी मुद्दा चलाइएको छ।
कपिलवस्तु । कपिलवस्तु महाराजगञ्ज बर्गदा घटनामा प्रहरीको गोली लागेर घाइते भएका एक जनाको उपचारको क्रममा मृत्यु भएको छ । कपिलवस्तुको महाराजगन्ज नगरपालिका वडा नम्बर ६ का २२ वर्षीय अरुण यादवको सोमबार बिहान ४ बजेतिर मृत्यु भएको हो ।
गत चैत ७ गते दुई समुदायबिच भएको हिंसात्मक आन्दोलनका क्रममा स्थितिलाई नियन्त्रणमा लिन प्रहरीले चलाएको गोली लागेर यादव गम्भीर घाइते भएका थिए ।
चितवन मेडिकल कलेजमा उपचारका क्रममा उनको मृत्यु भएको प्रहरी नायब उपरीक्षक रिपेन्द्र कुमार सिंहले बताए । यादवको आन्द्रामा गहिरो घाउ भएको र शल्यक्रिया समेत गरिएको थियो ।
घटनामा उनीसहित ५ जनालाई गोली लागेको थियो । अरू ४ जना भने भैरहवा मेडिकल कलेजमा उपचारपछि घर फर्किसकेका छन । गत चैत ७ गते ईदका दिन महाराजगन्जको बर्गदा गाउँमा नमाज पढ्ने क्रममा नजिकै रहेको काली मन्दिरमा चर्को स्वरमा भजन लगाइएको विषयमा मुस्लिम र हिन्दु समुदायबिच विवादले उग्र रूप लिएको थियो ।
सोही दिन महाराजगन्जको जिग्नाहा चोकमा आक्रोशित युवाहरूले प्रदर्शन गर्ने क्रममा स्थितिलाई नियन्त्रणमा लिन लाठी चार्ज, दर्जनौँ राउन्ड अश्रु ग्यास र हवाई फायरसहित गोली चलाइएको थियो।
घटनापछि मन्दिर तोडफोडको आरोपमा ६ जनालाई पक्राउ गरी मुद्दा चलाइएको थियो । तोडफोड र सामाजिक सञ्जालमा भ्रम फैलाएको आरोपमा प्रहरीले थप ४ जनालाई समेत पक्राउ गरी मुद्दा चलाएको थियो ।
