- सवारीसाधन खरिद, नामसारी र बीमा नवीकरणका लागि कार्यालयमा अनिवार्य उपस्थित हुनुपर्ने नियम हटाइएको छ।
- सवारीधनी स्वयं उपस्थित हुन नसकेमा प्रतिनिधिमार्फत दर्ता तथा नामसारी गर्न सकिने व्यवस्था गरिएको छ।
- डिलरको जाँचलाई मान्यता दिनुका साथै बायोमेट्रिकका लागि प्राविधिक पहुँच उपलब्ध गराइने भएको छ।
काठमाडौं । नयाँ तथा पुराना सवारीसाधन खरिद, नामसारी र बीमा नवीकरणका लागि सवारीधनी यातायात व्यवस्था कार्यालयमा अनिवार्य उपस्थित हुनुपर्ने व्यवस्था हटाइएको छ ।
यातायात व्यवस्थापन कार्यविधि निर्देशिका, २०६० संशोधन गर्दै सरकारले यस्तो सहजीकरण गरेको यातायात व्यवस्था विभागले जनाएको छ । पूर्वाधार विकास मन्त्रालयको मन्त्रीस्तरीय बैठकले सोमबार उक्त निर्णय गरेको हो ।
नयाँ व्यवस्थाअनुसार सवारीसाधनको पहिलो नामसारी गर्दा डिलरले गरेको जाँचलाई मान्यता दिइनेछ । खरिदकर्ता स्वयं उपस्थित हुन नसके वारेसनामा र आवश्यक परिचयपत्रसहित प्रतिनिधिमार्फत सवारी दर्ता तथा नामसारी गर्न सकिनेछ ।
त्यस्तै, सवारीसाधनको बीमा तथा नवीकरणका लागि पनि सवारीधनी कार्यालयमा उपस्थित हुनुपर्ने छैन ।
नामसारी प्रक्रियालाई सहज बनाउन सवारी दर्ता प्रणाली (VRS) मार्फत सम्बन्धित विक्रेता, वितरक तथा कम्पनीलाई बायोमेट्रिक विवरण लिन मिल्ने प्राविधिक पहुँच उपलब्ध गराइने विभागले जनाएको छ ।
सरकारको यो निर्णयले सेवाग्राहीको समय बचत हुनुका साथै सवारीसाधन दर्ता तथा नामसारीमा हुने प्रशासनिक झन्झट घट्ने अपेक्षा गरिएको छ ।
