दोहा, कतार । लुम्बिनी प्रदेश समन्वय परिषद् कतारले आफ्नो स्थापना दिवसको अवसरमा रक्तदान कार्यक्रम गर्ने भएको छ l
संस्थाको छैटौँ स्थापना दिवसको अवसर पारेर नेपाली रक्तदाता संघ, कतारको समन्वयमा यही शुक्रबार हमाद अस्पतालमा “बृहत् रक्तदान कार्यक्रम” आयोजना गर्न लागेको हो l “रक्तदान जीवनदान, जीवनदान महादान“ भन्ने मूल मन्त्रलाई अङ्गीकार गर्दै रगत अभावका कारण कसैले ज्यान गुमाउन नपरोस् भन्ने हेतुले रक्तदान कार्यक्रमको आयोजना गर्न लागिएको परिषद्का कार्यवाहक अध्यक्ष डिल्लीराम भट्टराईले बताए l
उनले शुक्रबार बिहान ८ बजेबाट मध्याह्न १ बजेसम्म चल्ने कार्यक्रममा उपस्थित हुन कतारमा स्थापित नेपाली संघ-संस्थाका प्रमुख, सामाजिक अभियन्ता लगायत कतारवासी सम्पुर्ण नेपालीहरूलाई अनुरोध गरेका छन् l
रक्तदाताले रक्तदान गर्दा ध्यान दिनुपर्ने कुराहरू :
१) रक्तदाता रक्तदान गर्न आउँदा आफ्नो कतारी आइडी वा लाइसेन्स वा हेल्थ कार्ड अनिवार्य हुनुपर्ने l
२) रक्तदाता कतार प्रवेश गरेको ६ महिना पूरा भएको हुनुपर्नेछ l
३) रक्तदाताले यदि पहिले रक्तदान गरेको भए २ महिना (६०दिन) पूरा भएको हुनुपर्नेछ l
४) रक्तदाता कम्तीमा ७ घण्टा सुतेको, एन्टिबायोटिक औषधि सेवन नगरेको, पछिल्लो २४ घण्टा भित्र मदिरापान सेवन नगरेको हुनुपर्नेछ l
५) रक्तदाताको उमेर १८ देखि ६५ हुनुपर्नेछ र तौल कम्तीमा ५० केजी हुनुपर्नेछ l
६) रक्तदाताको रक्तचाप र अन्य मापदण्ड रक्त संकलन टोलीमा खटिएका स्वास्थ्यकर्मीबाट निर्धारण गरेबमोजिम हुनेछ l
