नेपाल पत्रकार महासंघ अर्घाखाँचीले जिल्लाको पर्यटन प्रबर्द्धन तथा आर्थिक विकासमा टेवा पुराउने उद्देश्यले अर्घाखाँची पर्यटन प्रबर्द्धन कार्यक्रम २०८० अभियानको रुपमा सुरु गरेको छ ।
उक्त अभियानको नेपाल सरकारका प्रधानमन्त्री पुष्पकमल दाहालले माघ १ गते शुभारम्भ समेत गरेका छन् । दाहालले पत्रकार महासंघ अर्घाखाँचीले जिल्लाका बिभिन्न पर्यटकीय स्थलहरू समेटी तयार पारेको डकुमेन्ट्रीको प्रसारण गरी शुभारम्भ गरेका हुन् । यस सँगै जिल्लामा अभियानको बारेमा धेरै चर्चा हुन थालेको छ ।
पत्रकार महासङ्घले यो कार्यक्रम गर्दा धेरैले सकारात्मक रुपमा चर्चा गरेका छन भने केहीले फरक मत राखेको देख्न सकिन्छ । यति मात्र होइन आर्थिक स्रोत व्यवस्थापनको पक्षलाई लिएर समेत बजारमा माहोल तातेको देखिन्छ । आर्थिक स्रोत व्यवस्थापनका लागि स्थानीय, प्रदेश र संघ सरकारसँग अनुरोध गरेको र तीनै तहका सरकारले सहयोगको आश्वासन दिएको उक्त कार्यक्रमका प्रवक्ता हृदय कुमार भुसाल बताउँछन् । महासङ्घले भए गरेका गतिविधिमा हुने आयव्ययको विवरण सार्वजनिक गर्ने पनि भनेको छ । गर्नुपनि पर्छ ।
यस कार्यक्रमबाट तुरुन्तै आजको भोलि नै त्यति फरक नपर्ला तर दीर्घकालमा यसले जिल्लाको पर्यटन प्रबर्द्धन र आर्थिक विकासमा अवश्य टेवा पुग्ने नै छ । अर्थतन्त्र चलायमान यत्तिकै हुँदैन कोही न कोही त लाग्नै पर्ने हुन्छ, अहिले पत्रकार महासंघ लागेको छ । यो अभियान आफैमा एक सफल अभियान हो यद्यपि महासङ्घले जुन योजना बनाएको छ सो अनुरूप काम गर्न सके माहोल भिन्न बन्ने निश्चित छ । जिल्ला भित्रने प्रवेशद्वार देखी सदरमुकाम र अन्य मुख्य स्थानहरूमा होडिङ्ग बोर्ड, फ्ल्याक्स बोर्ड, र केही मुख्य ठाउँमा डिजिटल बोर्ड राख्ने, जिल्लाका पर्यटकीय स्थलहरूको फोटो प्रर्दशनी कार्यक्रम गर्ने, देशका मुख्य १० शहरमा जिल्लाका कम्तीमा १२ जनाको टोली गई प्रचार सामाग्री सहित अन्तरकृया र छलफल र स्वागत अर्घाखाँची कार्यक्रम सञ्चालन गर्ने, लुम्बिनी र सुपा देउराली मन्दिरमा सूचना डेक्स तयार गर्ने लगायतका योजनाको कार्यान्वयन गर्न जरुरी छ । महासङ्घले www.welcometoarghakhanchi.com नामक वेबसाइट निर्माण गरेको छ । त्यसमा जिल्लाको समग्र जानकारी भेट्न सकिन्छ । यि र यस्ता काम गर्दै जाँदा प्रभावकारिता पनि देखिँदै जान्छ ।
यसो त अर्घाखाँची आफैमा एक पावन भूमि हो । यहाँ विश्व भाषाको उद्गम स्थलदेखि आर्थिक, राजनैतिक, सामाजिक, सांस्कृतिक, शैक्षिक हरेक किसिमले महत्वपूर्ण स्थल यहाँ छन् । यिनको प्रचारप्रसार गर्न मात्र सके पनि जिल्लाको विकासमा कोशेढुङ्गा साबित हुने छ । तसर्थ यि सम्पदाको प्रचारप्रसार गर्ने गरी महासंघ अर्घाखाँचीले चालेको अभियान सफल बनाउन हरसम्भव कोसिस गरौँ, आफ्नो स्थानबाट लागौँ ।
