काठमाडौँ । नेपाली कांग्रेसका महामन्त्री गगनकुमार थापाले प्रधानमन्त्री पुष्पकमल दाहाल प्रचण्ड पदबाट हट्नुपर्ने डरले थर्कमान रहेको टिप्पणी गरेका छन्।
आइतवार ललितपुरको गोदावरी नगरपालिकाको ८ औँ स्थापना दिवसको अवसरमा उनले यस्तो टिप्पणी गरेका हुन् । उनले प्रधानमन्त्रीको कुर्सी बन्नुभन्दा पहिलादेखि नै हल्लिएको बताए। उनले कतिखेर धकेलिने र लड्ने भन्ने डर प्रधानमन्त्रीमा रहेको जिकिर गरे। उनले भने “अहिले बनेको प्रधानमन्त्रीको अहिलेदेखि- बन्नुभन्दा पहिलादेखि कुर्सी हल्लिएको छ। कतिखेर म यहाँबाट धकेलिने र लड्ने भन्ने डरले। त्यस्तो डराएको प्रधानमन्त्रीले वार फुटिङमा कसरी काम गर्छ?”
उनले डराएको प्रधानमन्त्रीले युद्धस्तरमा काम गर्न नसक्ने बताए । उनले नेपाली राजनीति फोहोरी खेलमा गएको दावीसमेत गरे। उनले राजनीति विकृत बनाएको कारणले गर्दा पद लोलुपता देखिने गरेको बताए।
महामन्त्री थापाले नेपालको राजनीति सफा नभए र राजनीतिलाई अहिलेको भन्दा शुद्ध नबनाएसम्म नेपालको समय खेर जाने बताए।
