देशको स्वाधीनता र अखण्डताको विषयवस्तु समेटेर तयार गरिएको राष्ट्रप्रेमले ओतप्रोत नेपाली चलचित्र काँडेतार प्रदर्शनमा अप्रत्यक्ष रुपमा रोक लगाइएको छ । राष्ट्रिय भावनालाई जगाउँदै सबैलाई सचेत गराउन खोजिएको नवल खड्काद्वारा निर्माण तथा निर्देशन गरिएको उक्त नेपाली चलचित्र प्रदर्शनमा रोक लगाइनुले नेपाली साहित्य, कला र सङ्गीतमाथि नै निर्मम प्रहार गर्न खोजिएको महसुस यतिखेर व्याप्त छ ।
नेपाली मौलिक संस्कृतिमाथि नै ठाडो हस्तक्षेप गरिएका विदेशी चलचित्रहरु खुलेआम प्रदर्शन भइरहेका छन् । देशभरका प्रायः सिनेमा हलहरुमा हिन्दी, अङ्ग्रेजीलगायतका फिल्महरुले कब्जा जमाइरहेको परिप्रेक्ष्यमा काडेतारमाथिको अप्रत्यक्ष प्रतिबन्ध पटक्कै सुहाएको छैन । चलचित्र प्रदर्शनका लागि अत्यन्तै न्यून संख्यामा हल उपलब्ध गराइनु, त्यसमा पनि प्राइम टाइम उपलब्ध नगराइनुले शंका गर्ने पर्याप्त आधार दिएको छ । वास्तबमा साहित्य र कलाले समाज बोल्छ, देश बोल्छ र मानवका भित्री मनहरु बोल्छ । यस्तो सन्दर्भमा यी क्षेत्रमा लागेका कलाकारहरुलाइ निरुत्साहित गर्ने उद्देश्यले चालिने कदम निश्चय पनि राष्ट्रियताको सबालमा दुरगामी असर पर्नेमात्रै होइन घातकसमेत बन्न सक्दछ । देशको सीमा सुरक्षा यतिबेला निकै चुनौतीपूर्ण अवस्थामा छ । सिमानाको रक्षा गर्नु विशेषगरी राज्यको जिम्मेवारी हो अनि नागरिकको पनि । नेपाल भूमिमाथि गिद्धे नजर राख्ने जोकसैको भण्डाफोर गर्नु सचेत नागरिकको कर्तब्य हो । यसै विषयलाई कलात्मक रुप दिएर पस्कन खोज्ने हरेक विधाका कलाकार एवं सचेत नागरिकहरूलाई प्रोत्साहन गर्नु राज्यको कर्तव्य हो तर उल्टै तिनीहरूका कामलाई दुरुत्साहित गर्नु कदापि उपयुक्त होइन । कविले कविता लेख्नु, नाटककारले नाटक लेख्नु, गीतकारले गीत लेख्नु उसको धर्म हो। त्यस्तो धर्मलाई प्रतिबन्ध गर्नु महापाप पनि हो । यसै सन्दर्भमा राष्ट्र जोगाउनु पर्छ भन्ने सन्देश प्रवाह गर्ने नेपाली कथानक चलचित्र ‘काडेतार’ माथिको प्रतिबन्धले तमाम नेपालीहरुको मनमा गम्भीर आशङ्का समेत पैदा गरेको छ । केवल व्यापारको मात्र उद्देश्य राखेर हचुवाको भरमा कहिल्यै चलचित्र नबनाउने सिनेकर्मी नवल खड्काले विशेष विषयवस्तुको छनोट गरी लामो समयको खोज, अनुसन्धान पछि मात्र चलचित्र निर्माण गर्दै आएका छन् l उनी आफ्ना हरेक चलचित्रको निर्माण पश्चात् चर्चामा आउने गरेका छन् l ‘काँडेतार’ मा भारतीय विस्तारवाद नीति, सिमा क्षेत्रमा बसोबास गर्ने नेपालीहरुले भोगिरहेको पीडा र नेताहरुको लम्पसारवादी चरित्रलाई यथार्थपरक रुपमा प्रस्तुत गरिएको छ l झट्ट हेर्दा कतिपयलाई चलचित्र भारत बिरोधीजस्तो लागे पनि वास्तमा चलचित्रमा तीतो यथार्थको भण्डाफोर गरिएको छ l यस चलचित्रले हरेक नेपालीको मनमा अन्तर्निहित राष्ट्रप्रेम र स्वाभिमानलाई पुन: जागृत गराउने काम गरेको छ ।
स्रष्टाले सिर्जना गर्ने विषयवस्तुहरु निर्वाधरुपमा पस्कने वातावरण बनाउदै कलाको सम्मान गर्न कुनै किसिमको कन्जुस्याइँ गर्नु पटक्कै जायज हुँदैन ।
