- कपिलवस्तुका विभिन्न स्थानबाट अवैध रूपमा भित्र्याइएको करिब १० क्विन्टल भारतीय केरा प्रहरीले बरामद गरेको छ।
- रोगको जोखिम र स्वदेशी उत्पादनलाई प्रोत्साहन गर्न सरकारले भारतीय केराको आयातमा रोक लगाएको छ।
- आयातमा रोक लाग्दा बजारमा केराको मूल्य दोब्बर बढेको छ भने व्यापारीहरूले आयात खुकुलो बनाउन माग गरेका छन्।
इमरान खान कपिलवस्तु : कपिलवस्तु जिल्लामा दुई छुट्टाछुट्टै स्थानबाट अवैध रूपमा भित्र्याइएको करिब १० क्विन्टल केरा प्रहरीले बरामद गरेको छ ।
कपिलवस्तुको शिवराज नगरपालिका–५ चन्द्रौटा खसी बजारस्थित न्यून आयरन फुड स्टोरमा गोदामभित्र लुकाइछिपाइ राखिएको अवस्थामा प्रहरीले छापा मारेर ९ सय १२ केजी केरा बरामद गरेको हो । बरामद केराको अनुमानित मूल्य ९१ हजार रुपैयाँभन्दा बढी रहेको प्रहरीले बताए ।
त्यसैगरी, कृष्णनगरमा सवारी साधन चेकजाँचका क्रममा ८० केजी केरा बरामद गरिएको थियो । उक्त केराको मूल्य ८ हजार रुपैयाँभन्दा बढी रहेको बताइएको छ । बरामद केरा आवश्यक कारबाहीका लागि कृष्णनगर भन्सार कार्यालय पठाइएको प्रहरी नायब उपरीक्षक रिपेन्द्रकुमार सिंहले जानकारी दिए ।
लेही दिन यता यशोधरा गाउँपालिका अन्तर्गत सीमा प्रहरी चौकी मर्यादपुर खुनुवा सिमानाकामा पनि १ सय २० केजी केरा बरामद गरेको थियो ।
केरामा लाग्ने ‘केआरफोर’ नामक रोगको जोखिम तथा स्वदेशी केरालाई प्रोत्साहन गर्ने उद्देश्यले सरकारले भारतीय केराको आयातमा रोक लगाउँदै आएको छ । बरामद केरालाई भन्सार परिसरमा गाडेर नष्ट गरिने कृष्णनगर भन्सार कार्यालयका सूचना अधिकारी मयंककुमार कर्णले बताए।
भारतीय केरा आयातमा रोक लगाएपछि कपिलवस्तुमा केराको मूल्य दोब्बरले बढेको छ । हाल केरा प्रतिकिलो रु ९० देखि १ सय रुपैयाँसम्म पुगेको छ । अभाव र बढी नाफाका कारण तस्करहरूले लुकिछिपी भारतीय केरा भित्र्याउने गरेका छन । त्यही केरा अहिले कपिलवस्तुका अधिकांश बजारमा निर्बाध रूपमा बिक्री भइरहेको छ ।
फलफूल व्यवसायीहरूका अनुसार नेपाली उत्पादनले मात्र बजारको माग धान्न सक्ने अवस्था नरहेको त्यसैले निश्चित मापदण्ड बनाएर केराको आयातलाई केही खुकुलो बनाउनुपर्ने उनीहरूको माग छ ।
