अर्घाखाँची । अर्घाखाँचीको सन्धिखर्क ८ किमडाँडाका युवा ठाकुर भुसालको आपको बगैंचामा लटरम्म आँप फलेका छन्। वैदेशिक रोजगारबाट फर्किएर कृषि पेशामा लागेका भुसालले यस वर्ष आँप बिक्रीबाट ७ लाखभन्दा बढी आम्दानी हुने अपेक्षा गरेको बताए।
झन्डै ५० वटा आपको बोटमा अहिले ९० क्वीन्टलभन्दा बढी फलेको छ। उत्पादन भएको आपको बिक्रीको लागि कुनै समस्या छैन । सन्धिखर्कमा मात्र हैन बुटवल र पोखरासम्मका व्यपारी घरमै पुगेर खरिद गर्ने गरेको कृषक भुसालले बताएका छन् । अहिले घरमै होलसेल ८० रुपैयाँ केजीमा आपको बिक्री हुने गरेको छ । कृषक भुसालको भनाइ छ ।
व्यवसायिक फलफूल तथा तरकारी खेतीबाट वार्षिक १६ लाखभन्दा बढी कमाउने गरेका छन्। उनले वेमौषमी तरकारी उत्पादन गरेर मनग्ये आम्दानी गरेका छन् । विदेशमा जस्तो दुःख गरे यहीँ माटोमा सुन फलाउन सकिन्छ भन्ने सोचले शुरु गरेको कृषि पेशा सबै युवाको लागि प्रेरणाको स्रोत पनि बनेको छ।
१८ वर्ष पहिले मकै, गहुँ र तोरी छर्ने बारीमा आँप लगाउने चलन थिएन। तर व्यवसायिक रुपमा तरकारी र फलफूल खेती गरेर पनि केही गर्न सकिन्छ भन्ने मान्यताका साथ आँपका बिरुवा लगाएको कृषक भुसालले बताए। तराईमा मात्र आँप खेती हुन्छ भन्नेका लागि यो उत्पादनले सबैलाई चकित पारेको छ।
