अर्घाखाँची । कांग्रेस नेता तथा निवर्तमान उपसभामुख पुष्पा भुसाल गौतमले अर्घाखाँचीबाट प्रतिनिधिसभा सदस्यमा उम्मेदवारी दर्ता गराएकी छिन् ।
निर्वाचन अधिकृतको कार्यालय सन्धिखर्कमा गएर गठबन्धनको तर्फबाट कांग्रेस उम्मेदवार भुसालले मनोनयन दर्ता गराएकी हुन् । उनीसँगै प्रदेशसभा (क) बाट माओवादी केन्द्रका ठाकुरकुमार बिक र प्रदेशसभा (ख) बाट कांग्रेसका कमल भुसालले उम्मेदवारी दर्ता गराए ।
गठबन्धनको सहयात्री दल राजमो सहभागी भएन । प्रदेशसभामा उम्मेदवारी नपाएकोमा असन्तुष्ट छ । राजमोले उम्मेदवारी दिने तयारीमा छ ।
संघीयतापछिको २०७४ को चुनावमा पुष्पा समानुपातिक उम्मेदवार बनिन् । संघीय संसद्की उपसभामुख उनी अहिले गठबन्धनको सहयोगमा एमाले सचिव रायमाझीसँग भिड्दैछिन् । रायमाझीले यसअघि २०६४ को पहिलो संविधानसभा चुनावमा कांग्रेसका मानबहादुर विश्वकर्मा, दोस्रोमा कांग्रेसका रामबहादुर विसी, ०७४ मा पनि कांग्रेसका बिसीलाई नै पराजित गरे ।
पहिलो संविधानसभामा छुट्टाछुट्टै निर्वाचन क्षेत्रबाट चुनाव जितेर १५ वर्षको अवधिमा रायमाझी पटक-पटक मन्त्रीसहित उपप्रधानमन्त्री भए । पुष्पा कांग्रेस संघीय संसदीय दलको सचेतक हुँदै उपसभामुख बनिन् ।
