अर्घाखाँची । अर्घाखाँचीको सन्धिखर्कबाट भारतको नयाँ दिल्लीसम्म वातानुकूलित, सुविधा सम्पन्न नेपाल भारत मैत्री बस सेवा सञ्चालन भएको छ ।
सन्धिखर्कबाट नयाँ दिल्लीसम्म बस सेवा सञ्चालन भएपछि रोजगारी तथा अन्य कामको लागि भारत जाने यात्रुहरु खुसी भएका छन् ।
पश्चिम नेपाल बस व्यवसायी प्रालिद्वारा सञ्चालन हुन लागेको बसको सन्धिखर्क नगरपालिकाका नगरप्रमुख कृष्णप्रसाद श्रेष्ठले उद्घाटन गरे । बस सेवाको सञ्चालन गर्दै प्रमुख श्रेष्ठले जिल्लाबाट दिल्लीमा पुग्ने यात्रुहरूका लागि सहजता भएको बताए ।
बस सन्धिखर्क, गोरुसिंगे, नेपालगञ्ज, लख्खिनपुर हुँदै दिल्ली पुग्नेछ । सन्धिखर्कबाट झण्डै ९ सय किलोमिटरको दूरीमा दिल्ली रहेको छ ।
३६ सिट रहेको बसमा २ चालक, २ परिचालक रहने बसको भाडादर ३ हजार २ सय नेपाली रहेको छ । अहिलेका लागि हप्ताको ३ दिन बस सेवा सञ्चालन हुनेछ ।
सोमवार, बुधवार र शुक्रवार सन्धिखर्कबाट ११ बजे दिल्ली र बुधवार, शुक्रवार र आइतवार दिल्लीबाट ८ बजे सन्धिखर्कका लागि छुट्ने छ ।
काठमाण्डौमा वातानुकूलित बस सेवा सञ्चालन गर्दै आएको यातायात व्यवसायीले मोटरबाटोको सहजतासँगै यातायात सेवा थप गरेको पश्चिम नेपाल बस व्यवसायी प्रालिको रुट सल्लाहकार भानुभक्त भुसालले बताए ।
