अर्घाखाँची । मालारानी ५ बाँगी निवासी बिष्णु क्षेत्रीका छोरा साजन क्षेत्री अहिले कक्षा ८ मा अध्ययान गरीरहेका छन् । उनी नेपाली सेनाले दिईरहेको एनसीसी तालिम लिईरहेको छन् । छोराले यो तालिम लिईरहदा क्षेत्री उत्साअित छन् । देख्दा यो सामान्य तालिम जस्तो देखिए पनि यसको धेरै फाईदा रहेको क्षेत्री बताउछन् । अहिलेका बालबालिकाहरु मोवाईलमा मात्र बढि केन्द्रीत हुने गरेको भन्दै यो तालिम धेरै महत्वपूर्ण रहेको उनको बुझाइ छ । उनि भन्छन “अहिलेका बालबालिका फोन तथा ईन्टरनेटमा बढि भुल्ने गरेका छन जसले गर्दा ब्यायम, अनुशासन जस्ता कुराहरुमा त्यति ध्यान जादैन । यो तालिमले अनुशासित, मर्यादित र ईमानदार बनाउन पनि सहयोग गर्छ । यसले खोज, राहत, उद्धार र प्राथामिक उपचारका लगायतका व्यवहारिक ज्ञान दिने भएकाले यो प्रभावकारी छ । यस्ता तालिम भईरहनु पर्छ ।”
राष्ट्रलाई अफ्ठ्यारो पर्दा योगदान गर्न सक्ने साहसी, इमान्दार र राष्ट्रभक्त जनशक्ति उत्पादनको लक्ष्य सहित नेपाली सेनाले विद्यार्थीहरुलाई वर्गिकरण गरेर तालिम दिंदै आएको छ ।
नेपाली सेनाले हरेक वर्ष निश्चित संख्यामा विद्यार्थीहरुलाई सैन्य तालिम दिँदै आएको छ । सिनियर र जुनियर डिभिजन बनाएर प्रत्येक वर्ष देशभरबाट विद्यालयहरु छनोट गरेर निश्चित मापदण्ड पुरा गरेका विद्यार्थीलाई तालिम दिने गरिएको छ । सोही अनुरुप यस वर्ष अर्घाखाँचीबाट ७२ जनालाई तालिम दिईदै छ । दुई ओटा विद्यायलका ३६ जना छात्र र ३६ जना छात्रा गरी ७२ जनालाई जुनियर डिभिजनको तालिम अभ्यास गराइने छ ।
सन्धिखर्कको गौरिशंकर इङिलश बोर्डिङ्ग स्कुल र ज्ञान प्रकाश मावी डिभर्नाका विद्यार्थीलाई नेपाली सेनाले राष्ट्रिय सेवा दल (एनसिसी) को तालिम दिन सुरु गरेको छ । ७९ दिने तालिममा खाली हात ड्रिल, तेक्वान्दो, एरोबिक्स, खुकुरी ड्रिल, मास पिटी लगायतका अभ्यासहरु गराईने ईश्वरी बक्स गुल्म म्यालपोखरीका गुल्मपती वासुदेव पङ्गेनीले जानकारी दिए ।
नेपाली सेनाको राष्ट्रिय सेवा दलद्वारा सञ्चालित जुनियर डिभिजन ४९औँ व्याचमा छनौट भएको विद्यालयमा सोमवार विद्यार्थीहरुलाई प्रथम प्रवचन समेत प्रदान गरिएको छ । गौरिशंकर र ज्ञान प्रकाश मावीमा भएका दुईओटा छुट्टाछुट्टै कार्यक्रममा बोल्दै प्रमुख जिल्ला अधिकारी कमलराज ढकालले विद्यार्थिलाई अनुशासित, मर्यादित र ईमानदार बनाउन राष्ट्रले यस्ता किसिमका तालिमहरु सञ्चालन गर्दै आएको बताए । तालिमले बालबालिकाहरुलाई स्वःअनुशासनमा बाँध्न सिकाउने भन्दै उनले राष्ट्रलाई आपतविपद् पर्दा जनशक्ती प्रयोग गर्न सकिने बताए ।
तालिमका चरणहरु पार गर्दै जाँदा सर्वोत्कृष्ट हुनेलाई विदेशमा समेत तालिमको अवसर दिने गरिन्छ । खोज, राहत, उद्धार र प्राथामिक उपचारका सम्बन्धमा व्यवहारिक ज्ञान समेत प्राप्त हुने भएकाले अभिभावक र विद्यार्थीहरुको तालिममा आकर्षण बढेको छ । यस अँघी गौरिशंकर इङिलश बोर्डिङ्ग स्कुलका विद्यार्थी अभिषेक गैरे नवलपरासीको हात्तीखोर शिक्षालयबाट उत्कृष्ट भएका थिए । उनले भारतमा गएर थप तालिम लिने अवसर प्राप्त गरेका थिए ।
२०७३÷०७४ मा सन्धिखर्कको भगवती मावी संखेटारीबाट सुरुवात भएको एनसिसी तालिम अन्य पालिकामा विस्तार गर्न भने चुनौती देखिएको छ । कार्यक्रममा जिल्ला प्रहरी कार्यालयका प्रमुख (डिएसपी) मुकुन्द रिजाल, सशस्त्र प्रहरी निरिक्षक दयाराम पौडेल, राष्ट्रिय अनुसन्धानका प्रहरी निरिक्षक खिमा पोख्रेल, विद्यालयका शिक्षक शिक्षिका, अभिभावक लगायतको उपस्थिती रहेको थियो ।
