दोहा, कतार । लुम्बिनी प्रदेश समन्वय परिषद् कतारले आफ्नो स्थापना दिवसको अवसरमा रक्तदान कार्यक्रम सम्पन्न गरेको छ । परिषद्को छैटौं स्थापना दिवसको अवसरमा नेपाली रक्तदाता संघ, कतारको समन्वयमा कतारको सरकारी अस्पताल हमाद अस्पतालमा “बृहत् रक्तदान कार्यक्रम-२०२४” सम्पन्न भएको हो ।
“रक्तदान जीवनदान, जीवनदान महादान“ भन्ने मूल मन्त्रलाई अंगीकार गर्दै रगत अभावका कारण कसैले ज्यान गुमाउन नपरोस् भन्ने हेतुले आयोजित कार्यक्रममा एक सय ४२ जनाको उपस्थिति रहे पनि ३५ जनाले मात्र रक्तदान गरेको परिषद्का कार्यवाहक अध्यक्ष डिल्लीराम भट्टराईले जानकारी दिए ।
बिहान ८ बजेबाट मध्याह्न १ बजेसम्म चलेको कार्यक्रममा कतारमा स्थापित नेपाली संघसंस्थाका प्रमुख, सामाजिक अभियन्ता लगायतको उपस्थिति रहेको थियो । यस्तै परिषद्ले रक्तदाताहरुलाई कदर पत्रले सम्मानसमेत गरेको थियो ।
