अर्घाखाँची । लुम्बिनी प्रदेशका मुख्यमन्त्री चेतनारायण आचार्यले अर्घाखाँचीको मालारानी गाउँपालिका–३ मा भएको जिप दुर्घटनाका मृतकका परिवारलाई भेट गरी समवेदना प्रकट गरेका छन् । अर्घाखाँची जिल्ला अस्पतालमा पुगेर मृतक परिवारका सदस्य संग भेट र घाइतेहरूको अवस्थाबारे जानकारी लिँदै उहाँले उपचारलाई प्रभावकारी बनाउन जाेड दिए ।
लुटीपोखरी–खनदह भित्री सडकखण्डमा लु २ च २९९० नम्बरको सिङ्गल क्याब जिप अनियन्त्रित भई करिब २५० मिटर तल खसेर दुर्घटना हुँदा दुई जनाको मृत्यु भएको थियाे भने दुई जना घाइते भएका थिए ।
लुटीपोखरीबाट खनदहतर्फ जाँदै गरेको जिप दुर्घटनामा गम्भीर घाइते भएका चालक दिलिप खनाल र बालकृष्ण रिजाललाई सन्धिखर्क अस्पताल लगिएकोमा बिहान ५:५५ बजे चिकित्सकले मृत घोषणा गरेका थिए ।
मुख्यमन्त्री आचार्यले सडक दुर्घटना न्यूनिकरणका लागि सम्बन्धित निकायलाई आवश्यक निर्देशन दिएका छन् ।
