एजेन्सी । रूसी ग्यास जर्मनी जाने बाल्टिक सागर पाइपलाइन नोर्ड स्ट्रीम–वनबाट १० दिनका लागि आपूर्ति बन्द भएको छ । यो पाइपलाइनको रूसी–ग्यास कम्पनी ग्याजप्रोमले वार्षिक तालिकाअनुसार मर्मतसम्भारका लागि बन्द गरिएको जनाएको छ । यद्यपि, जर्मनीले दबाबका लागि राजनीतिक रूपले आपूर्ति बन्द गरिएको टिप्पणी गरेको छ ।
यूक्रेनसँगको युद्धका कारण रुसमाथि ईयूले लगाएको प्रतिबन्धको प्रतिक्रियामा रुसले ग्यासलाई अस्त्रका रूपमा प्रयोग गरेको आरोप छ । यसअघि नै ग्यास आपूर्ति साबिकमा हुदै आएकोमध्ये ४० प्रतिशत मात्रै हुने गरेको थियो । ग्यास पाइपलाइन पूर्ण रुपमा बन्द भएमा जाडो यामका लागि जोहो गर्न बनाइएका भण्डार खाली हुनेछन् ।
पाइपलाइन बन्द हुँदा इटालीलाई पनि असर परिरहेको छ । अन्तर्राष्ट्रिय ऊर्जा एजेन्सी प्रमुखले रुसले पूरै युरोपमा ऊर्जा कटौती गर्नसक्ने भन्दै त्यसका लागि युरोप तयार हुनुपर्ने बताएका बीबीसीले जनाएको छ ।
