अर्घाखाँची । अर्घाखाँचीमा पछिल्लो ३ वर्षमा यौन दुरब्यबहारका ४० घटना भएका छन् ।
जिल्ला प्रहरी कार्यालय अर्घाखाँचीका अनुसार पछिल्लो ३ बर्षमा जबरजस्ती करणी, बाल यौन दुरब्यबहार र जबरजस्ती करणी उधोग जस्ता घटना गरी ४० वटा यौन दुरब्यबहारका केश दर्ता भएका छन् ।
जिल्ला प्रहरी कार्यालय अर्घाखाँचीका प्रहरी निरीक्षक निरोज चौलागाईका अनुसार अर्घाखाँचीमा आर्थिक बर्ष २०७६/०७७ मा ५ महिला र १० बालीका गरी १५ वटा करणीका मुद्धा दर्ता भएका थिए भने बाल यौन दुरब्यबहारका २ र जबरजस्ती करणी उधोगका २ घटना दर्ता भएका थिए ।
यस्तै आर्थिक बर्ष २०७७/०७८ मा ३ जना महिला र ६ जना बालिका सहित १० वटा जबरजस्ती करणीका मुद्धा दर्ता भएका छन् । चौलागाईका अनुसार सोही बर्ष ३ वटा बाल यौन दुरब्यबहारका मुद्धा दर्ता भएका छन् ।
आर्थिक बर्ष २०७८/०७९ मा ४ जना बालीका बलात्कृत भएको जिल्ला प्रहरी कार्यालयको तथ्याङ्क छ । बाल यौन दुरब्यबहारका ३ र जबरजस्ती करणी उधोगका १ घटना दर्ता भएको चौलागाईको भनाई छ ।
यो तथ्याङ्कलाई हेर्दा जिल्लामा बलात्कारका घटना कम हुदै आएको देखिन्छ । घटना पश्चात मुद्धा दर्ता नगराउने, घटनालाई ढाकछोप गर्ने प्रबृतीले पनि बलात्कारका घटना तथ्याङकमा कम हुदै आएको हुन सक्ने सरोकारवाला बताउछन् ।
