अर्घाखाँची । अर्घाखाँचीको सन्धिखर्क नगरपालिका वडा नम्वर ८ किमडाडामा महिला कृषकहरुकालागि सञ्चालन गरिएको वित्तीय शिक्षा तथा व्यवसायिक साक्षरता कार्यक्रम सम्पन्न भएको छ ।
कृषि विकासको लागि अन्तराष्ट्रिय कोष (IFAD) को अनुदान सहयोगमा नेपाल सरकार अर्थ मन्त्रालय मार्फत कृषि विकास बैंक लिमिटेड सन्धिखर्क शाखाद्धारा सञ्चालन भएको वित्तीय शिक्षा तथा व्यवसायीक साक्षरता तालिमको एक कार्यक्रमका बिच समापन गरिएको हो ।
सन्धिखर्क ८ किमडाडामा रहेको समुन्नती महिला कृषि बचत तथा ऋण सहकारी सस्था लिमिटेडका सदस्यहरुलाई लक्षित गरीे वित्तीय शिक्षा तथा व्यवसायीक साक्षरता कार्यक्रम सञ्चालन भएको थियो ।तालिममा बचत, कर्जा, कर्जा ब्यबस्थापन, जोखिम ब्यबस्थापन, वीमा, विप्रेषण, उद्यम , उद्यमशिलता, व्यबसायीक खेती, बजार तथा बजारीकरण संगै कृषि विकास बैंकबाट प्रबाह हुने वित्तिय सेवाको बारेमा सहभागीहरुलाई प्रशिक्षण प्रदान गरिएको थियो । साथै सहभागीहरुलाई कृषि विकास वैंक मार्फत सञ्चालित किसान परियोजनाको किसान क्रेडिट कार्ड, तथा किसान मोवाइल एपको प्रयोगका बारेमा पनि जानकारी प्रदान गरिएको वित्तीय शिक्षा तथा व्यवसायीक साक्षरता कार्यक्रमका फिल्ड सुपरभाइजर नारायण खनालले बताए ।
तालिमले कृषक बर्गमा आफ्नो वित्तीय स्रोतको सही परिचालन र सदुपयोग गर्न, कृषिको आधुनिकीकरण तथा व्यवसायीकरण गरी आर्थिक समृद्धि हासिल गर्न सहयोग पुराएको तालिमका सहभागीले बताएका छन् ।
तीन चरणमा गरी महिला सहकारीका ७५ जना सदस्यहरुलाई प्रदान गरिएको तालिम कार्यक्रमकोे समापन समारोहमा मन्तब्य राख्दै वडा अध्यक्ष हुम प्रसाद बन्जाडेले तालिममा सिकेका कुराहरुलाई व्यवहारमा उतार्न आग्रह गरेका थिए ।
सहकारीका अध्यक्ष मिना खत्रीको अध्यक्षतामा सम्पन्न भएको कार्यक्रममा कृषि विकास वैैंक सन्धिखर्क शाखाका प्रबन्धक दुर्गा प्रसाद खनाल, वित्तीय शिक्षा तथा व्यवसायीक साक्षरता कार्यक्रमका फिल्ड सुपरभाइजर नारायण खनाल, सहजकर्ता कमला पोख्रेल, सहकारीका प्रबन्धक विन्दु भुसाल, विष्णु आचार्य लगायतले मन्तब्य राखेका थिए ।
