अर्घाखाँची । अर्घाखाँची जिल्लाको पाणिनी गाउँपालिकामा अर्थिक बर्ष २०७९/८० को बजेट पास हुन सकेको छैन ।
असार मसान्त भित्र पास भएर श्रावण १ देखि कार्यन्वयनमा आउनु पर्ने बजेट अहिले सम्म पनि पास हुन सकेको छैन् । कार्यपालिका बैठक भित्र आ–आफ्नै अडानका कारण बजेट पास हुन ढिला भएको हो ।
गाउँपालिकाका ८ वटा वडाहरुमा ६५ लाख बराबरको सिलिङ पठाएको भए पनि सबै वडाका वडाअध्यक्षहरुले सो सिलिङ अनुसारको बिवरण उपलब्ध नगराउँदा बजेट पास हुन नसकेको पालिका प्रमुख टेकराज न्यौपानेको भनाई छ ।
यता अध्यक्षले समन्वयकारी भुमिका निर्वाह नगरेको कारण निति तथा कार्यक्रम पेश भए पनि बजेट भने पास हुन नसकेको पाणिनी गाउँपालिका वडा नं. २ का अध्यक्ष चन्द्रकान्त पौडेलले बताउँछन् । “अध्यक्षले एक तर्फ झुकाव राख्नु भो त्यसैले सहमति हुन सकेन” पौडेलले भने ।
बजेट पास नहुदा के हुन्छ ?
अन्तर सरकारी वित्त व्यवस्थापन ऐन २०७४ अनुसार स्थानीय सरकारले १० असारमा बजेट ल्याउनु पर्छ । यो बजेट असार मसान्तसम्म पास गरिसक्नु पर्छ । १ साउनबाट बजेट कार्यान्वयन शुरु हुन्छ । बजेट पास नगरी स्थानीय तहहरुले बजेट खर्च गर्न पाउँदैनन् ।
तर, बजेट पास नभएको अवस्थामा वा ल्याउन नसकेको अवस्थामा अनिवार्य दायित्वमा मात्र खर्च गर्ने गरी कार्यपालिकाले बजेट चलाउन सक्छ । त्यसरी खर्च गरेको बजेट पनि अन्ततः व्यवस्थापिकाबाट भने पास गराउनै पर्छ ।
यसरी बजेट ल्याउन नसक्दा स्थानीय सरकारको प्राथमिकता अनुसार विकास निर्माण र पूँजीगत काम अगाडि बढ्न सक्दैनन् । तलव भत्ता मात्र खाएर स्थानीय सरकार संचालन हुन्छ ।
स्थानीय सरकारहरु स्वायत्त भएका कारण बजेट समयमै नल्याउने स्थानीय सरकारलाई केन्द्रले कानूनी रुपमा कारवाही भने गर्न सक्दैन । यो अवस्थामा स्थानीय सरकारबाट कार्यान्वयन हुने कार्यक्रमहरु भने प्रभावित हुने गरेका छन् ।
