काठमाण्डौ । पूर्वपश्चिम राजमार्गको नवलपरासी दाउन्ने खण्डमा एकतर्फी गाडी चल्न थालेका छन् । गएराति परेको पानीले दाउन्ने सडकखण्डको खुर्सानी खोलानजिक सडक भत्किएको थियो ।
बर्दघाट नगरपालिका–४ अन्तर्गत पर्ने खुर्सानी खोलामा गएराति ११ बजेतिर भत्किएको सडक बिहान ८ बजेपछि मर्मत थालेर झन्डै डेढ घण्टाको प्रयासमा सडक एकतर्फी खुलेको हो ।
अहिले रोकिएका गाडीलाई आलोपालो गरेर गन्तव्यतर्फ लाग्ने व्यवस्था मिलाएको जिल्ला ट्राफिक प्रहरी कार्यालय नवलपरासीका प्रहरी जवान मोहन शाहीले उज्यालोलाई जानकारी दिए ।
दाउन्ने खण्ड केही दिन अघिदेखि आंशिक रूपमा बन्द गरेर सडक निर्माण कार्य हुँदै आएको छ । यो सडकमा यात्रा भने सहज छैन ।
गएराति बाटो भत्किएपछि पश्चिमबाट पूर्व जाने गाडी बर्दघाट र पूर्वबाट पश्चिमका लागि छुटेका गाडी दुम्किबास ज्यामिरेमा रोकिएको थियो ।
अहिले रोकिएका गाडी र यात्रु गन्तव्यतर्फ लाग्न थालेका छन् । सडक दुईतर्फी नै खुलाउन भने समय लाग्ने ट्राफिक प्रहरीको भनाइ छ ।
