अर्घाखाँची । ११औँ अन्तर्राष्ट्रिय योग दिवसको अवसरमा पाणिनि गाउँपालिकामा योग शिविर सम्पन्न गरिएको छ।
वडा नं. ३ स्थित खिदिम आयुर्वेद औषधालयको आयोजनामा “सिंगो पृथ्वी र मानव सभ्यताका लागि योग” भन्ने नाराका साथ आयोजित कार्यक्रममा पाणिनि गाउँपालिकाका अध्यक्ष टेकराज न्यौपाने, प्रमुख प्रशासकीय अधिकृत रोमनाथ न्यौपाने, वडा नं. ३ का अध्यक्ष तथा सामाजिक विकास समिति संयोजक युवराज ज्ञवाली, कर्मचारी, पत्रकार तथा स्थानीयको उल्लेखनीय सहभागिता रहेको थियो।
औषधालयको प्राङ्गणमा भएको कार्यक्रममा औषधालयका अधिकृत अनुपमा आचार्यले योग अभ्यास गराएकि थिइन । गाउँपालिकाका अध्यक्ष टेकराज न्यौपाने र प्रमुख प्रशासकीय अधिकृत रोमनाथ न्यौपानेले योगको अभ्यासद्वारा मानव जीवनमा मानसिक तथा शारीरिक सन्तुलन कायम गर्न सकिने भन्दै योगलाई दैनिक जीवनमा समावेश गर्न सहभागीहरूलाई आग्रह गरिएको थियो।
प्रत्येक वर्ष जुन २१ मा अन्तर्राष्ट्रिय योग दिवस मनाइन्छ। संयुक्त राष्ट्रसंघको महासभाले सन् २०१४ मा गरेको निर्णय अनुसार सन् २०१५ देखि हरेक वर्ष यो दिवस मनाउन थालिएको हो।
